LIMA PULSE · Emergency Care Readiness Campaign
دي مش أجندة. دي سكربت تشغيل. اليوم ده أقصر من الأول بساعتين ونص، وده معناه إن مفيش وقت ضايع. كل بلوك ليه: وقت محدد، هدف واحد، اللي بتقوله، اللي بيعملوه، والرقم اللي بتقيسه في الآخر.
الدليل ده اتزامن مع الإصدار 3.1 من المحاضرة. لو معاك نسخة مطبوعة قديمة، ارميها — الجدول والحالات فيها بقت غلط.
| الحاجة | كان | بقى |
|---|---|---|
| الفرز والـ NEWS2 | بلوكين منفصلين، والـ NEWS2 بعد الاستراحة | بلوك واحد 45 دقيقة بتقوده الممرضة، وبينتهي بتسليم رسمي |
| الحالات | ست حالات، تسع خطوات، 50 دقيقة | تلات حالات لايف، ستة أسئلة، 24 دقيقة — والباقي في الـ case library |
| حالة الربو | حالة مستقلة | مش بتتشرح لايف — هي نفسها مريضة الـ walkthrough |
| الـ Simulations | 20 دقيقة للاتنين | 35 دقيقة + 8 دقايق شاشة تجهيز |
| ترتيب التدهور | ترتيب ثابت: التنفس أول، الضغط آخر | مفيش ترتيب عام — نمط توضيحي فقط |
| جدول الـ NEWS2 | «اللي بيلزم الفريق» | RCP escalation guidance — يُكيَّف على مسار ليما/الوزارة |
RECOGNISE → CALL FOR HELP → ABCDE → TREAT AS YOU FIND → REASSESS → ESCALATE
ستة جُمَل اتغيّرت في 3.1 (التدهور · NEWS2 · وضعية الأنافيلاكسيس · الكورتيزون · سوائل الـ shock · الـ trauma والـ tourniquet). الجدول الكامل بصيغة «ماتقولش / قول» في Section 06. راجعه قبل اليوم بيوم.
زرار NOTES في المحاضرة بيفتح الملاحظات جوه نفس الصفحة — يعني على الشاشة اللي بتعرضها، قدام الغرفة. ده للتحضير، مش للعرض.
عشان تقراها وإنت واقف: افتح نسخة الـ facilitator من المحاضرة واضغط زرار Present (أو حرف P). هيفتح شباك تاني فيه:
الترتيب يوم المحاضرة: وصّل اللابتوب بالبروجيكتور واختار Extend مش Duplicate → افتح المحاضرة وحطّها على شاشة البروجيكتور → اضغط Present → اسحب الشباك التاني على شاشة اللابتوب. البروجيكتور يفضّل على المحاضرة، وإنت بتبصّ على ملاحظاتك.
افتح المحاضرة على الموبايل أو التابلت واضغط NOTES عليه، والبروجيكتور من اللابتوب. أو الأسهل — الدليل ده اللي في إيدك مطبوع. هو أصلاً نفس الكلام ومرتّب بالدقيقة.
مهم: النسخة اللي على الموقع للمتدربين مافيهاش الملاحظات دي خالص — لا الزرار ولا النص. الملاحظات في نسخة الـ facilitator بس، وهي متاحة للتحميل من صفحة اليوم عشان أي مركز تاني يقدر يعيد تشغيل اليوم.
اليوم الأول علّم الناس يعملوا إيه لما القلب يقف. اليوم ده عن الساعة اللي قبلها. والفرق بين اليومين مش في المحتوى — في إن اليوم ده ليه مهارة واحدة أساسية وكل حاجة تانية بتخدمها.
إنك تعمله «كورس حالات» — ساعة أزمة ربو، وساعة أنافيلاكسيس، وساعة سبسيس. لو عملت كده، الناس هتطلع عارفة شوية معلومات عن كل حالة، ومش قادرة تبدأ في أي حالة. الحالات مش هي الدرس. الحالات هي التمرين. الدرس هو الـ ABCDE.
ABCDE لوحده، بعمق، مع الـ walkthrough
Station بعد المحاضرة على طول
تلات حالات لايف، نفس الستة أسئلة بالظبط
Simulation + checklist من ١٠ بنود
كل الحالات بتمشي على نفس الستة أسئلة: What do you see? → ABCDE, where is the threat? → What do you do NOW? → After treatment → What do you reassess? → Escalate / transfer. في الحالة الأولى هتشرح الأسئلة. في التالتة المفروض تلاقيهم بيسبقوك — ودي علامة النجاح مش الفشل.
RECOGNISE → CALL FOR HELP → ABCDE → TREAT AS YOU FIND → REASSESS → ESCALATE
ده مرساة الذاكرة لليوم كله. بيظهر في أول كل فصل والخطوة الحالية مضيّية. قولها صراحة في الافتتاح: «لو ما فتكرتوش أي حاجة تانية، افتكروا الشريط اللي فوق كل شاشة.»
«ممكن ما أعرفش التشخيص فورًا، بس أنا عارف بالظبط أبدأ إزاي بأمان.»
الـ benzodiazepine بتاع الـ status epilepticus — أنهي دوا وأنهي تركيز وأنهي طريق موجود فعلاً في المركز، ومين مصرّح له يديه. المادة متعمّد إنها مش كاتبة جرعة. لو دخلت اليوم من غير الإجابة دي، الجزء ده هيبقى نظري بحت.
| الدور | مين | شغله بالظبط |
|---|---|---|
| Lead Facilitator | أنت | المحاضرة، التلات حالات اللايف، الـ trauma والـ drowning، قيادة الـ simulations، الديبريف |
| Triage Presenter | الممرضة | جلسة الـ triage كاملة (35 دقيقة) — بتقدّمها هي، مش إنت |
| Station Instructor ×2 | زميلين متبرّفين قبلها بيوم | Stations 1 و 2. بيصحّحوا بالكارت — مش بيحاضروا |
| Timekeeper / Scribe | ممرض أو إداري | ماسك الساعة، بيعلن آخر 5 دقايق لكل بلوك، وبيدخّل نتايج الـ checklist |
دي مش «فقرة تشريفية». الـ triage شغل تمريض بالأساس، والناس هتسمعها من زميلة بتشتغل على المكتب فعلاً — ودي أقوى بكتير من إن دكتور يشرحها.
الفرز والـ NEWS2 بقوا بلوك واحد متصل اسمه Part 1، مدته 45 دقيقة (08:10–08:55)، الممرضة بتقوده كله من أوله لآخره، وبينتهي بـ تسليم رسمي ليك. مافيش بلوك NEWS2 منفصل بعد الاستراحة زي ما كان قبل كده.
افتح المحاضرة، روح على 01 · Triage + NEWS2، اضغط Presenter notes، وابعتلها الملف. جوّه الـ notes فيه سكربت كلام كامل بالإنجليزي — جملة الافتتاح، الـ 11 خطوة بالترتيب، التطبيق على ليما، الأخطاء الشائعة، وإزاي تدير تمرين «مين الأول». هي تذاكر منه، مش تحفظه.
| # | الخطوة | الهدف الواحد |
|---|---|---|
| 1–2 | الانطباع الأول · الـ red flags | عشر ثواني من آخر الترولي |
| 3–4 | مستويات الـ ONSET · «مش فرز بالزحمة» | الفئة بتوصف المريض مش الزحمة |
| 5 | العلامات الحيوية — سؤال الـ RR 32 | معدل التنفس غالبًا علامة مبكرة وحسّاسة |
| 6 | شكل التدهور — مفيش ترتيب ثابت | الاتجاه والسياق، مش قايمة محفوظة |
| 7–8 | الـ NEWS2 — يعني إيه + الحاسبة لايف | رقم يمشي في التليفون |
| 9 | لما الرقم ما يكفيش · جدول الاتجاه (4 قراءات) | الضغط ساب صفر لأربع ساعات ونص |
| 10 | المريض اللي بيستنى | فئة من غير اسم ووقت = مش فرز |
| 11 | تحدي «مين الأول؟» | الاختلاف نفسه هو الدرس |
النسخة القديمة كانت بتعلّم ترتيب ثابت للتدهور (معدل التنفس الأول… الضغط آخر حاجة). ده اتشال. الصح اللي في النسخة 3.1: معدل التنفس غالبًا علامة مبكرة وحسّاسة، والضغط ممكن يفضل طبيعي لحد وقت متأخر في الـ compensated shock — لكن مفيش ترتيب عام، والترتيب بيتغيّر حسب السبب (نزيف، اضطراب نظم، أنافيلاكسيس، هبوط سكر، تسمم أفيوني). لو قالت «الضغط بينزل آخر حاجة» كقاعدة — صحّحها في البريفينج مش قدام الناس.
جدول الـ NEWS2 في المحاضرة مكتوب عليه صراحة إنه RCP escalation guidance — مش سياسة ليما. الجملة الصح: «دي إرشادات الـ RCP، ومسار التصعيد عندنا هو المعتمد من الوزارة/المركز.»
ماتقفش جنبها وتكمّل وراها. لو غلطت في تفصيلة صغيرة، سيبها — وصحّحها في الاستراحة أو في الديبريف. لو قاطعتها مرة، هي مش هتقدّم تاني.
كراسي نصف دايرة، مش صفوف. بروجيكتور + لابتوب. سبورة عليها سؤال اليوم. كل واحد قدامه كارت ABCDE وورقة NEWS2.
أربع نقط منفصلة على أطراف القاعة، كل واحدة عليها لافتة بالاسم. المسافة بينهم كافية إن الصوت مايتداخلش.
سرير أو ترولي + manikin + مونيتور + ترولي الطوارئ. يفضّل يكون في غرفة العلاج الحقيقية — واقعية المكان بتغيّر الأداء.
الـ simulation في المكان الحقيقي مش في القاعة. عايز الناس تتلخبط في نفس الأدراج اللي هتتلخبط فيها يوم الحالة الحقيقية — ده اللي بيطلّع الـ system gaps.
لو غيّرت حاجة هنا، غيّرها هناك — المتدربين شايفين الجدول على الشاشة في الافتتاح.
| الوقت | البلوك | مين | الهدف الواحد | د |
|---|---|---|---|---|
| 08:00–08:10 | Admin تسجيل · pre-test · الافتتاح | Scribe + أنت | مسار واحد، مش تمن أمراض | 10 |
| 08:10–08:55 | Lecture Part 1 — الفرز + الـ NEWS2 · ينتهي بتسليم رسمي | الممرضة | مين اللي ما يقدرش يستنى — وإزاي نثبتها برقم | 45 |
| 08:55–09:05 | Lecture Chapter 01 — المريض شكله تعبان؟ | أنت | حكم آخر الترولي نتيجة إكلينيكية | 10 |
| 09:05–09:45 | Lecture Chapter 02 — ABCDE + walkthrough لايف | أنت | أربع خطوات جوّه كل حرف | 40 |
| 09:45–10:00 | Break استراحة | — | — | 15 |
| 10:00–10:08 | Lecture Chapter 03 · Shock | أنت | الـ shock تروية مش رقم ضغط | 8 |
| 10:08–10:32 | Lecture Chapter 04 — تلات حالات لايف أنافيلاكسيس · سبسيس · تشنج/هبوط سكر | أنت | نفس الستة أسئلة تلات مرات | 24 |
| 10:32–10:47 | Lecture Chapter 05 · Drowning | أنت | CPR بالنفس الأول، الـ AED بعده | 15 |
| 10:47–10:57 | Lecture Chapter 06 · Trauma — <C>ABCDE | أنت | تغيير واحد بس في أول الترتيب | 10 |
| 10:57–11:07 | Practice Escalate · SBAR | أنت + الكل | التعرّف من غير تصعيد = ناقص | 10 |
| 11:07–11:15 | Practice شاشة التجهيز للـ simulation | أنت | «عارفين الإطار — دلوقتي استخدموه من غير لافتات» | 8 |
| 11:15–11:50 | Simulation Sim A و Sim B + ديبريف كامل | الكل | checklist من 10 بنود، تقييم لايف | 35 |
| 11:50–12:00 | Admin الخلاصة · post-test · feedback | Scribe | الفرق بين الرقمين | 10 |
حالة الربو (الحالة 1) مش هتتشرح لايف. هي نفس المريضة بتاعة الـ walkthrough في Chapter 02 — يعني لو شرحتها تاني تكون علّمت نفس المرض مرتين وضيّعت 8 دقايق. سيبها في الملف كمرجع ومذاكرة ذاتية، وقول للناس كده صراحة، واعدّي. الـ 8 دقايق دي راحت للـ simulation والديبريف — وده أهم مكان ممكن تحطهم فيه.
في 4 ساعات مفيش مكان لبلوك stations منفصل. الحل: الـ stations متوزّعة جوّه البلوكات — تمرين الـ ABCDE جوّه بلوك 09:05، الـ NEWS2 جوّه Part 1 عند الحاسبة، الأكسجين جوّه بلوك الحالات، والـ SBAR في بلوك 10:57. التفاصيل في Section 07. لو عندك 5 ساعات بدل 4، حوّلهم لبلوك مستقل 40 دقيقة بعد الاستراحة.
افتح على الحالة الأولى مباشرة: راجل 58 سنة، شكله تعبان، ومحدش عارف التشخيص. خد إجابتين أو تلاتة بصوت عالي قبل ما تكشف الاختيار الصح. الإجابات الغلط هي المفيدة — لأنها اللي الناس بتعملها فعلاً تحت الضغط.
1 Look → 2 Find the threat → 3 Act → 4 Reassess
نفس الأربع خطوات في A وB وC وD وE — من غير استثناء. قولها بصوت عالي في أول حرف، وفي التالت سيب القاعة تقولها معاك. المونيتور تحت الحروف نفس المريض والأرقام بتتحسّن مع علاج كل حرف — اقرا الأرقام بصوت عالي عند كل انتقال، ده اللي بيخلّي «treat as you find» حاجة تتشاف مش تتقال.
خلّص عليها هنا خلاص. لما توصل لبلوك الحالات، أشّر على الحالة 1 وقول: «دي نفس المريضة اللي لسه شغّالين عليها — موجودة في الملف للمذاكرة»، وابدأ من الحالة 2.
سمّي ممرضة تضغط، وخلّي القاعة تصوّت الأول. اقرا الأرقام بصوت عالي كل ما تتغيّر — المقصود إن الأرقام بتردّ على اللي بتعمله.
لما البرنامج يرفض يعدّي — ماتعتذرش. الرفض ده أهم لحظة تعليمية في الصبح كله: مينفعش تسيب خطر على الحياة من غير علاج ورا ضهرك. لو حد صرخ «دي أزمة ربو» في أول 30 ثانية، وافقه — وبعدين اسأله هتعمل إيه، وبأي ترتيب.
الـ Timekeeper بيعلن آخر دقيقتين لكل حالة. كل حالة بتمشي على نفس الستة أسئلة، وخد إجابة من القاعة عند «What do you do NOW?» قبل ما تعدّي الخطوة.
| # | الحالة | الحرف | الحاجة الواحدة | لو الوقت ضاق |
|---|---|---|---|---|
| 1 | Asthma — مرجع فقط | B | هي نفسها مريضة الـ walkthrough | مش بتتشرح لايف أصلاً — أشّر عليها واعدّي |
| 2 | Anaphylaxis | A+B+C | أدرينالين عضل الأول · نوّمه | لا تُختصر — دي أكتر حالة ممكن تحصل هنا النهاردة، في غرفة الحقن |
| 3 | Sepsis | C | ماتستناش الضغط ينزل | لا تُختصر — أكتر حالة بتتفوّت في الفرز |
| 4 | Seizure / هبوط سكر | D | شغّل الساعة · اقيس السكر | اكتفِ بـ: شغّل الساعة · اقيس السكر · متربطش · متحطش حاجة في البق |
أشّر على Case library تحت في المحاضرة واعدّي. موجودة عشان ما تقطعش السرد، مش عشان تتشرح النهاردة. استخدمها بعدين: حالة كل اجتماع، حالة كل درِل، حالة كل بوست واتساب. لو مضطر تشرح واحدة لايف، خلّيها الـ ACS.
| المكان | ماتقولش (كان في 3.0) | قول |
|---|---|---|
| التدهور | «معدل التنفس أول علامة، والضغط بينزل آخر حاجة» كترتيب ثابت | معدل التنفس غالبًا علامة مبكرة وحسّاسة · الضغط ممكن يفضل طبيعي لحد وقت متأخر في الـ compensated shock · مفيش ترتيب عام |
| NEWS2 | «الجدول ده بيلزم الفريق يعمل كذا» | «دي RCP escalation guidance — ومسار التصعيد المعتمد عندنا هو اللي بيتنفّذ» |
| Anaphylaxis · الوضعية | «نوّمه على ضهره» بس | «ماتوقّفوش وماتمشّيهوش. نايم على ضهره — إلا لو الضيق بيفرض إنه يقعد ورجليه ممدودة» |
| Anaphylaxis · الكورتيزون | يُفهم كعلاج مساعد روتيني | «الكورتيكوستيرويد مش موصى بيه روتينيًا في العلاج الطارئ الأولي، وما يأخّرش الأدرينالين العضلي أبدًا» |
| Cardiogenic shock | «بلعة السوائل ممكن تقتله» | «السوائل ممكن تزوّد الاحتقان الرئوي — تُعطى لما تكون مُستطبّة فقط، ومع إعادة تقييم» |
| Obstructive shock | «السوائل مش هتنفع» | «السوائل ما بتعالجش السبب — العلاج النهائي هو رفع الانسداد» |
| Trauma · <C> | «المجرى الهوائي يستنى الـ 15 ثانية» | «اوقف النزيف الكارثي الخارجي فورًا — ومع وجود فريق، تقييم المجرى الهوائي بيمشي بالتوازي» |
| Trauma · tourniquet | «عالي وضيّق» كقاعدة | «أعلى من الجرح، حسب التدريب وتعليمات المُصنّع والبروتوكول المحلي — واكتب الوقت» |
إنك تفتح الـ Presenter notes على البروجيكتور. اضغط N وتأكّد إنها مقفولة قبل ما تبدأ. لو المتدربين شافوا السكربت، الأسئلة بتموت.
كل station 10–12 دقيقة، ونفس نموذج الأربع خطوات: وريهم بالصح → قسّمها → خلّيهم يعملوها → صحّح بالكارت.
في أزواج: واحد «مريض» وواحد بيقيّم بصوت عالي. المعيار: ينطق كل حرف، ويعلن اللقطة والتدخل قبل ما ينتقل. الغلط الشائع: يقيّم في دماغه من غير كلام.
PASS = 5 letters spoken · treatment declared at the letter · returns to A
تدّيهم 3 مجموعات قراءات مكتوبة، وكل واحد يحسب على الورقة في أقل من دقيقة، وبعدين يتأكدوا بالحاسبة على الشاشة. المعيار: الرقم صح + يقول إيه اللي لازم يحصل.
PASS = correct total · names the escalation · spots a single-parameter 3
الأجهزة اللي عندنا فعلاً على الترابيزة: نازال، سيمبل ماسك، ريزرفوار، نيبولايزر، spacer، bag-mask. كل واحد يمسك ويقول: الهدف كام، وليه.
PASS = states the target (94–98 · 88–92 if at risk of CO₂ retention · asthma: oxygen only if SpO₂ <92, upper limit 95) · assembles BVM correctly
بعد كل simulation، اللي كان leader بيدّي SBAR بصوت عالي للقاعة زي ما يكون في التليفون. واحد تاني يقول: هتسيب اللي في إيدك وتيجي ولا لأ؟
PASS = the Recommendation is explicit and time-bound
الـ Station Instructors — بالكارت المطبوع، مش من دماغهم. وبيدّوا ملاحظة واحدة إيجابية وواحدة للتحسين. مش أكتر.
كان 20 دقيقة، بقى 35 دقيقة (11:15–11:50) زائد 8 دقايق شاشة تجهيز قبلها (11:07–11:15). الوقت ده جه من إن حالة الربو ما بقتش تتشرح لايف. ده أهم مكسب في اليوم — ماترجّعوش لبلوك المحاضرة مهما ضاق الوقت.
| الوقت | اللي بيحصل |
|---|---|
| 11:07–11:15 | شاشة التجهيز — «عارفين الإطار · دلوقتي استخدموه · من غير لافتات». سمّي الـ leader، ووزّع الأدوار، واعرض الـ checklist العشرة قدامهم قبل ما تبدأ. مفاجأة التقييم مش جزء من التعليم. |
| 11:15–11:29 | Sim A — 9–10 دقايق سيناريو + 4 دقايق ديبريف بالسكربت الثابت |
| 11:29–11:43 | Sim B — leader مختلف · 9–10 دقايق + 4 دقايق ديبريف |
| 11:43–11:50 | ديبريف مشترك 7 دقايق — الأنماط المشتركة بين السيناريوهين، والدرجات الفرعية التلاتة، وحاجة واحدة تتحط في سجل الإجراءات التصحيحية |
التشخيص ما يتقالش أبدًا. السكربتات الكاملة جوّه المحاضرة في § Simulation preparation تحت Presenter notes.
Sim A برضه حالة ربو — يعني لو مشيت بالافتراضي، القاعة تكون شافت الربو في الـ walkthrough وبعدين في الـ simulation. ده مقبول لأن الـ simulation بيقيس الأداء مش الاسترجاع. بس لو حسّيت إن القاعة اتشبعت من الربو، غيّر افتتاحية Sim A لأي عرض غير محدد تاني (مثلاً: «راجل 52 سنة بيقول عنده ألم في صدره وشكله متعرّق») وسيب باقي السيناريو زي ما هو — الـ checklist ما بيتغيرش.
| Sim A | Sim B | |
|---|---|---|
| جملة الافتتاح | «ست 34 سنة جابها قريبها. بتتخنق. ده كل اللي تعرفوه.» | «راجل 67 سنة لقوه مشوّش الصبح. بنته بتقول تعبان من يومين.» |
| اللي المفروض يوصلوله | Acute severe asthma (أو anaphylaxis لو حلّوها بسرعة) | Sepsis (أو seizure بسبب أيضي قابل للعلاج) |
| لحظة الاختبار | تحسّن جزئي عند 4 دقايق — هل هيوقفوا التحويل؟ | الضغط نزل آخر حاجة — هل شافوا التروية قبله؟ |
| لو اتأخروا | الصدر يسكت، الوعي ينزل → respiratory arrest | 78/40، الوعي ينزل، أطراف مبقّعة |
«إيه اللي قالك إن دي حالة خطيرة قبل الأرقام ما توصل؟» · «إمتى طلبت مساعدة، وكنت تقدر تطلب أبدري؟» · «إيه اللي أعدت تقييمه بعد أول علاج؟» · «قرار التحويل اتاخد إمتى — وكان ينفع أبدري؟»
«إنت غلطت لما...». استبدلها بـ «في اللحظة دي، إيه اللي كان واضح قدامك؟». الأولى بتقفل الناس، والتانية بتفتحهم.
الأرقام اللي بتطلع من اليوم ده وبتتسجّل في سجل البرنامج:
«اليوم ده مكانش عن ثمن حالات. كان عن ترتيب واحد. لو نسيتوا كل الجرعات اللي قلتها، وفضل معاكم إنكم تبصّوا للمريض قبل المونيتور، وتعالجوا اللي لقيتوه مكانه، وترجعوا تقيّموا بعد كل تدخل — اليوم نجح. أحسن cardiac arrest هو اللي بنمنعه.»
بعد كده على طول: لينك الـ post-test، وبعده الـ feedback. ماتسيبش حد يمشي من غير ما يعمل الاتنين — الرقم من غير مقام مش رقم.
| لو حصل... | اعمل إيه |
|---|---|
| حالة حقيقية دخلت المركز | وقّف اليوم فورًا. الحالة أهم. وبعدين ارجع واستخدمها كأحسن سيناريو ممكن — بموافقة وبدون تفاصيل تعرّف المريض. |
| البروجيكتور وقع | المحاضرة ملف واحد شغال أوفلاين — افتحه على اللابتوب أو حتى موبايل، والناس تتجمّع. وكروت الـ ABCDE مطبوعة أصلاً. |
| الممرضة اتغيّبت | الـ Presenter notes سكربت كامل — أي ممرضة تانية تقدر تمشي عليه بـ 20 دقيقة تحضير. ماتاخدش الجلسة لنفسك إلا كآخر حل. |
| الوقت ضاق 20 دقيقة | اقص حالة من التلاتة حسب جدول الأولويات (Section 06) — ابدأ بالتشنج. ماتقصّش من الـ ABCDE ولا من الـ simulation ولا من الديبريف. |
| الحضور 6 بس | مجموعة واحدة. الـ stations تبقى تتابعية، والـ simulation الاتنين بنفس الفريق بأدوار متبادلة. |
| الحضور 25 | 5 مجموعات. الـ walkthrough والحالات زي ما هي؛ الـ simulation يبقى مجموعتين بيلعبوا والباقي مراقبين بورقة التقييم — والمراقبة بورقة تعليم مش تفرّج. |
| جرعة اتسألت وإنت مش متأكد من الـ protocol المحلي | قول: «ده في السياسة المعتمدة عندنا وهنأكده ونرجعلكم.» واكتبها. ماتخمّنش قدام الناس. |
المادة دي حالتها WORKING — not clinically approved لحد ما بنود الـ local policy الإحدى عشر تتقفل. لو هتقدّم قبل كده، قول ده للناس صراحة في الأول، وعلّم على الحاجات اللي لسه بتتأكد منها. الصراحة دي بتزوّد مصداقيتك مش بتقللها.
ليما مافيهاش بروتوكول محلي مكتوب زي المستشفيات. فالمحاضرة بتقول المعيار الإكلينيكي كامل وبتسمّي المصدر — من غير تعمية ولا «حسب البروتوكول المحلي».
المعيار ما بيتغيّرش حسب اللي واقف في الغرفة. اللي بيتغيّر هو مين بيعمل أنهي جزء منه، وده محدَّد في الوصف الوظيفي في ليما وسياسة الأدوية بوزارة الصحة العُمانية. ولو الصلاحية مش معاك — مهمتك تجيب اللي معاه أسرع. ده إجراء، مش تأخير.
في المحاضرة كل حالة ليها ثلاث مسارات: إجراء فوري لأي موظف مُدرَّب · دور التمريض · دور الطبيب. اقرا المسارات دي بصوت عالي في الحالة الأولى بس، وبعدها الغرفة هتعرف الشكل.
١ · هل يقدر التمريض يدّي أول جرعة أدرينالين عضل في الحساسية المفرطة قبل الوصفة؟
٢ · مين يقدر يدّي midazolam buccal خارج أوقات الدوام؟
٣ · مين معاه مفتاح الأدوية المراقبة الساعة ٢ الفجر؟
لو أي إجابة كانت «على حسب مين موجود» — دي فجوة، تتسجّل في سجل الإجراءات التصحيحية، مش تتناقش يوم الحالة.
التعريف: تشنج مستمر 5 دقايق أو أكتر. شغّل الساعة من أول لحظة.
| الحالة | الدواء | الجرعة |
|---|---|---|
| فيه وريد | Diazepam IV | الجرعة 10 mg (أو 5 mg لو مسنّ أو أقل من 50 كجم) · المعدل: بالراحة، أقصى 5 mg في الدقيقة |
| مافيش وريد | Midazolam buccal | 10 mg (أو 5 mg لو مسنّ أو أقل من 50 كجم) |
لو ما وقفش، تتكرر جرعة واحدة بعد 10 دقايق. الحد الأقصى جرعتين بنزوديازيبين. الفشل بعد جرعتين = established status epilepticus ومحتاج دواء خط تاني — وإحنا ما عندناش خط تاني وريدي في ليما. يعني عند النقطة دي العلاج هو التحويل نفسه: نادي الدكتور، ادعم المجرى الهوائي والتنفس، وحرّك المريض.
البنزوديازيبين بيسبب هبوط في الوعي وفي دافع التنفس يعتمد على الجرعة — وكمان بعد ما التشنج يقف، وده بالظبط الوقت اللي التركيز بيقلّ فيه. المراقبة مستمرة، وكن مستعد تدعم التهوية.
ملاحظة للأمانة العلمية: NICE NG217 خطها الأول للكبار في المستشفى هو IV lorazepam 4 mg — وده مش موجود عندنا. مسار الديازيبام/الميدازولام ده هو البديل المتاح من الفورمولاري، ومصدره مسار NHS GGC. قول ده صراحة لو حد سأل.
| الحالة | العلاج |
|---|---|
| واعي ويقدر يبلع بأمان | 15–20 جم كربوهيدرات سريع · أعِد القياس بعد 10–15 دقيقة · كرر 3 مرات كحد أقصى · بعدين 20 جم كربوهيدرات طويل المفعول |
| فاقد الوعي / بيتشنج / ما يقدرش يبلع | Glucose 20% — 100 مل وريد على مدى ~15 دقيقة أو Glucose 10% — 200 مل وريد على مدى ~15 دقيقة الاتنين = 20 جم بالظبط |
| مافيش وريد | Glucagon 1 mg عضل — أقل فعالية في سوء التغذية والصيام الطويل والكحول وأمراض الكبد · مافيش جرعة تانية · محتاج بعدها 40 جم كربوهيدرات |
إحنا بنمسك 50%، لكن JBDS مابقاش بيوصي بيه وريديًا. ده محلول شديد التوتر (أوزمولالية ≈2522 مقابل 506 للـ 10%) وممكن يعمل تلف نسيجي ونخر جلدي لو خرج بره الوريد، ومفيش فرق في معدل إعادة العلاج مقابل الـ 10%. استخدم 20% أو 10%. الـ 50% آخر حل، وقولها في التسليم.
بعد أي علاج: أعِد قياس السكر بعد 10 دقايق. الهدف أكبر من 4.0 mmol/L ومع تحسّن المريض. ماتلغيش جرعة الأنسولين المستحقة. بعد sulfonylurea أو أنسولين طويل المفعول الخطر بيفضل 24–36 ساعة — المريض ده يتراقب أو يتحوّل، ما يروّحش.
الطبيب: اختيار الدواء والجرعة والمدة حسب المصدر المشتبه به والشدة والحساسية، وقرار التحويل، والكلام مع المركز المستقبِل.
التمريض: التعرّف · التصعيد فورًا · الوريد · المزارع لو متاحة من غير تأخير الدواء · تحضير اللي اتوصف والتأكد من الجرعة · مراجعة الحساسية وتوافق الخط · تسجيل وقت أول جرعة بالظبط · إعادة التقييم بعد كل تدخّل · تجهيز التحويل.
أي موظف مُدرَّب: يجيب عربية الطوارئ وصندوق الأدوية · يركّب المونيتور · يشغّل الساعة · ينادي الطبيب بالاسم.
الساعة هنا مؤشّر قابل للتدقيق: الوقت من التعرّف لأول جرعة هو اللي بيتقاس في المراجعة، مش نوع الدواء.
| الدواء | AWaRe | جرعة مرجعية للكبار | دوره الحقيقي |
|---|---|---|---|
| Ceftriaxone | Watch | 1–2 جم مرة يوميًا (الشديد عند 2 جم) · تسريب 30 دقيقة · السحايا: 2 جم كل 12 ساعة | العمود الفقري لكل شيء تقريبًا |
| Metronidazole | Access | 500 مجم كل 8 ساعات (الشائع دوليًا) · نص الجرعة في القصور الكبدي الشديد | تغطية لاهوائية — لما يكون فيه مصدر لاهوائي فقط |
| Ampicillin | Access | 150–200 مجم/كجم/يوم مقسّمة · السحايا: 2 جم كل 4 ساعات | Listeria فوق الـ 50 سنة أو الحمل أو نقص المناعة، والـ enterococci |
١ · الميترونيدازول مش إضافة بريئة. SSC 2026 بيقترح ضده كتغطية تجريبية لما مافيش عوامل خطر لاهوائية — والبيانات الرصدية أظهرت نتائج أسوأ تشمل زيادة الوفيات. يتضاف في: البطن · النساء والولادة · التهاب الأنسجة الرخوة المتنخّر · الرأس والرقبة · الدبيلة · خراج الجهاز العصبي. مش في التسمم الدموي غير المحدد ولا الالتهاب الرئوي العادي ولا التهاب الحويضة والكلية.
٢ · السيفترياكسون بيترسّب مع الكالسيوم. ماتحلّهوش وماتخفّفهوش في Hartmann's / Ringer's، وماتديهوش مع محلول فيه كالسيوم على نفس الخط. استخدم محلول ملح 0.9%. في مركز بخط أو اتنين وسط إنعاش تسمم دموي — ده هيحصل فعلاً لو محدش اتدرّب عليه.
٣ · «إحنا إدينا المضاد» مش معناها «الميكروب متغطّى».
مافيش عندنا أمينوجليكوزيد ولا ماكروليد ولا مضاد للسيدومونا ولا تغطية MRSA ولا مضاد فطريات. يعني ما نقدرش نكمّل نظام WHO AWaRe المفضّل في: الالتهاب الرئوي المجتمعي الشديد · التهاب الحويضة والكلية الشديد · التسمم الدموي مجهول المصدر · التسمم الدموي مع نقص العدلات. دي مش حاجة نتحايل عليها — دي بند بمالك وتاريخ إعادة تدقيق.
| الإجراء | مين | دور التمريض |
|---|---|---|
| إدارة المجرى الهوائي وأدواته | الأطباء | الوضعية · الشفط · الأكسجين · التهوية بالقناع والكيس في حدود التدريب · النداء بدري |
| الصدمة الكهربائية المتزامنة والتنظيم الخارجي | الأطباء | التعرّف على عدم الاستقرار · توصيل المونيتور واللاصقات · تجهيز جهاز الصدمة · النداء |
| اختيار المضاد الحيوي | الطبيب الواصف | التحضير والإعطاء بعد الوصف · التوثيق |
ولسه محتاجين قرار: إيه الأجهزة اللي فيها وضع متزامن وتنظيم، ومين الأطباء المدرّبين عليها.